كشفت الفنانة السورية أصالة عن تعرضها لواقعة سرقة خلال رحلتها الفنية الأخيرة إلى الولايات المتحدة الأميركية، موضحة أن علبة مجوهراتها اختفت من غرفتها في الفندق عقب إحيائها سلسلة من الحفلات الناجحة في عدد من المدن الأميركية.
وروت أصالة تفاصيل الواقعة في رسالة مطولة نشرتها عبر حساباتها على مواقع التواصل الاجتماعي، استهلتها بالتعبير عن سعادتها بالنجاح الكبير الذي حققته جولتها الغنائية، مؤكدة أن الهدف من الرحلة تحقق، وأنها قدمت حفلات وصفتها بأنها من أجمل حفلات حياتها، وسط تفاعل جماهيري فاق توقعاتها.
وقالت أصالة: "الحمد لله الهدف من الرحله لأمريكا تحقق وعملت أحلى حفلات بالحياة وأسعدت ناس بالآلاف وأنا كنت سعيده قدهم كلهم وكانت البدايه بلوس أنجلوس وليله عظيمه وبعدا رحت نيوجرسي وكمان التفاعل كان متل الحلم وآخر حفله كانت تاني يوم مباشرة بديترويت ويادوب وصلت الفندق وحضرت حالي وغيرت مجوهراتي اللي الحمد لله كلهم إلي وماكان معي شي أنا مابملكه وهيك عادة بالسفر بعمل بخاف من المسؤوليه فا بلبس أغراضي ورحت الحفله وكانت قمه بالجمال والحضور مرعب والجو خيالي والناس طارت وأنا كذلك وخلصت الحفله ورجعت تعبانه حضرت حالي للراحه ونمت والصبح فتحت شنطتي غير حلقي اللي بحب غيره كل يوم حسب شو حاسه وللأسف مالقيت علبة مجوهراتي كلها وطبعاً زعلت لأسباب كتيره أولها وأهمها إني عملت بأوقات طويله و انتظرت أكتر من سنه إسم أبي حطه على راسي وصورة أبي بصدري وذكريات مهمه من جوزي ومن ولادي وهدايا مني إليّ بمناسبات نجاح حفله أو ألبوم أو أغنيه وكمان هدايا من أصحاب غاليين عليي وأغراضي غير قيمتها الماديه إلها قيمه عندي معنويه كبيره
وطبعاً الشرطه والناس ملت المكان ومن أسبوع تقريباً لليوم مافي أخبار وماكنت بدي خبر خبر يأثر على هالرحله اللي حققت فيها حلم من أحلامي وفاقت توقعاتي حتى بالنجاح ولكن هيك صار وبعد تفكير قررت خبركم هالحكايه اللي فوق ماتتصوروا قاهرتني ولكن رح أتجنبها وكمل بطريقي ورح ألتقي بحبايبي بدبي بمناسبه عزيزه على قلبي وغاليه تحت عنوان ( الإمارات تحب سوريا ) والله يحفظ بلادنا كلها ويعم الحب ويعم السلام يارب العالمين ..
وبدي أنسى هالكم يوم اللي كانوا كتير مو حلوين وصعبين عليي كتير
ورح نتلاقى وأنا بأمس الحاجه لأفصل عن هالأحداث اللي صارت وبدي أكتر من كل الحضور أفرح لأني بحاجه أفرح بينكم ومعكم
ومحبتكم عندي والله بتسوى كنوز الدنيي كلها
ولحظة لقائي معكم هيي ولاده حقيقيه لسعاده بتتحقق لما بغني لكم
ودبي رح تجمعنا".
